ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន ប្រកាសបញ្ជាក់សារជាថ្មីម្តងទៀតពីការឈរឈ្មោះជាបេក្ខជននាយករដ្ឋមន្ត្រីសម្រាប់ការបោះឆ្នោតក្នុងឆ្នាំ២០២៣ ខាងមុខនេះ ដោយថាការជ្រើសរើសលោក ហ៊ុន ម៉ាណែត ជាបេក្ខភាពអនាគតនាយករដ្ឋមន្ត្រីគឺជារឿងធម្មតារបស់គណបក្សនយោបាយសម្រាប់ត្រៀមបំរុងទុកទៅថ្ងៃខាងមុខ។

សម្តេចបានថ្លែង បែបនេះនៅក្នុងពិធី សម្ពោធដាក់ឱ្យប្រើប្រាស់ជាផ្លូវការនូវស្ពានអាកាសនិងផ្លូវក្រោមដីចោមចៅ ថ្ងៃទី៣១ ខែមីនា ឆ្នាំ២០២២នេះ។

សម្តេចបានលើកឡើងថា៖ «គណបក្សប្រជាជនជាគណបក្សមានរូបសញ្ញារទេវតា អញ្ចឹងខ្ញុំសូមបញ្ជាក់ថា បេក្ខជននាយករដ្ឋមន្ត្រីសម្រាប់ការបោះឆ្នោតឆ្នាំ២០២៣ គឺហ៊ុន សែនដដែល។ […] ហ៊ុន ម៉ាណែត ជាបេក្ខជនបន្តវេនដែលត្រូវបានត្រៀមបំរុងទុកជារឿង ធម្មតារបស់គណបក្សនយោបាយនីមួយៗ បក្សណាគេរៀបចំហ្នឹងរឿងរបស់គេ យើងគោរពការសម្រេចចិត្តរបស់ពួកគេ ប៉ុន្តែសូមឱ្យគេទទួលស្គាល់ការសម្រេចចិត្តរបស់គណបក្សប្រជាជនផងដែរ ព្រោះការបំរុងទុកសម្រាប់អ្នកជំនាន់ក្រោយត្រូវតែត្រៀមរៀបចំ បើមិនចឹងវិបត្តិនឹងកើតឡើង»៕